مقالة العدد علي منتديات كورة

من طرف **hima** الأحد ديسمبر 05, 2010 11:48 am

لما أقوللك "نضافة".. إيه اللي ممكن ييجي في بالك؟
لون أبيض؟ ميّه وصابون؟ جيوب موظف في آخر الشهر؟!
أنا في رأيي إن النضافة حاجة نسبية جدًا.. بيختلف مفهومها من شخص للتاني.. يعني اللي أنا شايفاه نضيف ممكن حد تاني يشوفه مش نضيف خالص..
كلنا متفقين على إن النظافة من الإيمان.. وعلشان كده لازم برضه كلنا نتفق على حد أدنى من معايير النضافة بحيث ما نسيبش مجال لـ"متطرفي النضافة"..
آه والله متطرفي النضافة.. زي أي حاجة تانية في الدنيا فيها المتطرف والمعتدل النضافة ممكن تبقى حاجة واحد ما يهتمش بيها خالص وواحد تاني تمثل له أهم حاجة في حياته لدرجة الوسواس وواحد تالت معتدل لا هو كده ولا هو كده..
النضافة الشخصية _لو هنحطلها معايير زي ما قلنا_ هنبتدي بنضافة أهم حاجة بنستخدمها كل يوم في الشيل والحط والسلام والأكل.. إيدينا..
ومن فضلك ما تتريقش عليا لما أقول لك إن فيه حملة عن غسيل الإيدين وتقول لي ما كل واحد في الدنيا بيعرف يغسل إيده !
تصدق إن غسيل الإيدين ليه طريقة معينة علشان يؤدي غرضه يعني انت لو حطيت إيديك الاتنين تحت الميه ودعكتهم في بعض مرتين ده مش بيشيل إلا جزء صغير من الجراثيم.. لكن لازم تمرر المية ما بين صوابعك وتخلل بينهم وتسيب الصابون ولو لـ3 ثواني علشان يعمل مفعول !!
طب تصدق كمان إن فيه أمراض اسمها الأمراض "ذاتية العدوى" أو اللي الإنسان بيكون فيها مصدر العدوى لنفسه ومش لحد تاني؟! زي الدودة الشريطية، ودي أساس الوقاية منها غسيل الإيدين بشكل صح..
تفتكر بحركة بسيطة زي كده ممكن الموضوع يفرق معاك قد إيه في صحتك في ظل كل التلوث والأمراض اللي محاصرانا كل يوم؟!